اولا مؤشر ال 70 زى ما كلنا عارفين مختلف تماما فى شكله عن مؤشر ال 30 وطبعا ده شىء غريب مش موجود فى اى بورصة فى العالم غير بورصتنا الحبيبة لان نظرية داو بتقول ان طالما سوق واحد وليه اكتر من مؤشر المفروض المؤشرات دى بتكمل بعض وبتأكد بعض زى مثلا مؤشر الداو جونز والناسدك والاس اند بى لو فتحتهم كلهم حتلاقيهم تقريبا كوبى من بعض والاختلاف ممكن يحصل فى يوم او اتنين بس فى الاخر كلهم ماشيين فى اتجاه واحد
لكن احنا بقى عندنا حالة نادرة تخلى علماء التحليل الفنى يقفو عاجزين قدامها
ندخل بقى فى الموضوع
دلوقتى مؤشر ال 70 مر بفترات عصيبة كتير زى ما احنا عارفين من ايقاف اسهم مرورا بأزمة دبى وبعد كدة مرض الرئيس ومع ان مؤشر ال 30 فى كل الازمات دى كان بيقف على رجليه تانى وبيعمل قمم اعلى من قمم الا ان مؤشر ال 70 كان بيعمل قمم اقل من قمم لغايت ما وصلنا للشكل النهائى للمؤشر والى احنا واقفين عليه
زى ما احنا شايفين فى الشكل واضح جدا ان القمم اقل ما القمم السابقة والقيعان كمان اقل ( القمم الى هى متعلمة باللون الاحمر والقيعان الى متعلمة بالمثلثان الخضراء ) علشان خاطر الاخوة الى لسة جداد فى التحليل الفنى او الى معندهمش فكرة
طبعا مع القمم الهابطة والقيعان الهابطة كونا اتجاه هابط على المدى المتوسط وطويل الاجل وعلشان نخرج من الاتجاه الهابط ده لازم المؤشر يخترق المستطيل الهابط الى مرسوم فى الصورة واختراقه حيبقى تقريبا عند ال 680 لغايت ال 700 نقطة هو بصراحة مش واضح بس لما نبقى نوصل هناك حنعرف الاختراق حيبقى فين بالظبط
اما المربع الصغير الى باللون اللبنى فده موقعنا دلوقتى من المؤشر وممكن نكبر المربع ده علشان نعرف احنا رايحين فين
بصراحة مش عارف الصورة حتبقى واضحة ولا لا بس المهم دى صورة مكبرة للمربع اللبنى الى كان فى الصورة الاولى وزى ما احنا شايفين احنا كنا نازلين وبعد كدة دخلنا فى منطقة عرضية لكن المشكلة بقى ان احنا مع التعريضة دى كونا مثلث متماثل والمشكلة الاكبر اننا كسرنا المثلث ده لاسفل بقالنا 3 جلسات ومش عارفين نرجع تانى جوة شكل المثلث ده علشان نخترقه لاعلى ويبقى اتجاهنا صاعد على المدى القصير
لكن الى يخوف اكتر هما اخر اربع شمعات فى الرسمة الاربع شمعات دول بيكونو شكل من اشكال السلبية على الشموع اليابانية اسمهم
BEARISH FALLING THREE METHODS
او بالظبط زى الى فى الصورة الى جاية
زى ما احنا شايفين شكل الشموع بيبقى عبارة عن شمعة هابطة كبيرة وبعد كدة 3 شمعات صغيرة صاعدة او خضرة لكن الثلث شمعات دول اعلى شمعة فيهم عند نص الشمعة الكبيرة الهابطة الى كانت فى الاول وبعد كدة بنلاقى فجأة شمعة كبيرة سودة او حمرة بتبقى تقريبا اد الشمعة الاولى الهابطة
وفى المؤشر عندنا لو شفنا اخر اربع شمعات حنلاقى بوضوح شمعة كبيرة هابطة وبعد كدة 3 شمعات صغيرة خضرة وخلى بالكو ان التلت شمعات الخضرة كمان برة المثلث المتماثل والمفروض لو الشكل ده صحيح ان يبقى فيه بكرة نزول بنفس مقدار الشمعة الحمرة الى فى الاول الى هى كانت نازلة عندنا 12 نقطة يعنى بكرة مؤشر ال 70 احتمال كبير ينزل 10 او 12 نقطة علشان الشكل يكمل وساعتها حتبقى مشكلة تانية ان المؤشر حيبعد عن شكل المثلث المتماثل وحيبقى صعب انو يرجعلو تانى بس مش مستحيل
المهم الاحتمال ان شكل المؤشر بكرة حيبقى كدة بعض اضافة الشمعة الخامسة الهابطة
كدة يبقى الشكل كمل بالظبط شمعة كبيرة هابطة وتلت شمعات صاعدة بس صغيرة وبعد كدة شمعة كبيرة هابطة تانى
ده تصورى لجلسة بكرة ارجو انى مكنش سببت اى زعل لحد بس حاولت اجتهد واعمل حاجة اساعد بيها الناس ولو الكلام ده محصلش بكرة اعتبرو اكنى مقلتش حاجة واعتبروها تهيؤات منى او خزعبلات ههههههههههههه
وشكرا
اخوكم محمد الشناوى
ليست هناك تعليقات:
إرسال تعليق